Plantun de Prouvènço

Pèr coumpara dos planto d'encò nostre

Alchemilla xanthochlora & Epilobium dodonaei subsp. dodonaei

Alchemilla xanthochlora

Rosaceae

Nom en français : Alchémille jaune vert.

Descripcioun :
Li pato-de-lioun soun maleisado à destria. Pamens aquelo, pulèu coumuno dins li relarg fres e umide de mountagno èi pas la mai tihouso. Es uno planto pulèu grando e bèn drecho emé uno enflourejado que despasso bèn li fueio. Dóu group ALCHEMILLA, fau verifica que s'atrobon proun de dènt sus li tros de fueio, que i'ague ges de péu sus l'ipantium (ensèn di pèço souto l'ouvàri), nimai sus lou dessubre di fueio ; pamens li péu de pecou de fueio soun bèn dre.

Usanço :
Li fueio (ensalado e té) coume li racino soun manjadisso. Èi couneigudo pèr sougna li plago, li bruladuro e pèr sarra li car, adounc bono contro la cacagno. Tambèn s'utiliso pèr d'ùni proublèmo de femo (règlo, pacholo...).

Port : Erbo
Taio : 15 à 60 cm
Fueio : basalo
Tipe bioulougico : Emicriptoufite
Cicle bioulougico : Planto renadivo

Gènre : Alchemilla
Famiho : Rosaceae

Ordre : Rosales

Coulour de la flour : Jauno
Petalo : 4
Ø (o loungour) flour : 2 à 3 mm
Flourido : Printèms - Estiéu

Sòu : Ca
Autour basso e auto : 100 à 2400 m
Aparado : Noun
Mai à juliet

Liò : Pelouso fresco - Riéusset - Prado à rousèu
Estànci : Subremediterran à Subaupen
Couroulougi : Éuroupenco
Ref. sc. : Alchemilla xanthochlora Rothm., 1937 (= Alchemilla vulgaris auct. )

Epilobo(-di-fueio-de-roumanin)

Epilobium dodonaei subsp. dodonaei

Onagraceae

Noms en français : Epilobe à feuilles de romarin, Épilobe de Dodoens.

Descripcioun :
Epilobo que trachis en ribo d'aigo e dins lis esboudèu. Se recounèis subretout à si lòngui fueio que dounon d'èr à-n-aquéli dóu roumanin. La subsp. Dodonaei s'atrobo en plano fin qu'à l'estànci mountagnard. Sis estile soun de memo loungour que lis estamino.

Usanço :
Tant se poudrié qu'aguèsse li mémi usanço medicalo que lis àutris epilobo, pamens avèn pas d'entresigne segur pèr aquelo. Li jòuini fueio de la subsp. fleischeri èron acampado à passa tèms en Savoio e mesclado i soupo.